الكميات المستهلكة من العلف يوميا للارانب

صباح الخير

انا انهاردة جايب لكم موضوع الكميات المستهلكة من العلف يوميا للارانب

فى نقطة لازم نعرفها و احنا بنقدم العلف للارانب و هى اعمار الارانب و حالتها و ممكن نقسمهم كالاتى :

1- ذكور
2- امهات فاضية
3- امهات عشار
4- امهات مرضعة
5- فطام
6- سلالات

فى نقطة احب اشير ليها لان فى ناس كتيرة بتقع فيها و هى انك لو زودت علف للارنب هاياكل مش هايقولك لا بس انت لازم تحدد الكميات اليومية ليه عشان حاجتين

* اول حاجة انه ما يتخنش و يربى دهن بالبلدى يليس
* تانى حاجة عشان العلف غالى مش رخيص فلازم تلتزم بجرعات محددة يوميا

1- الذكور : فى الغالب معدل اكلها ثابت 150 جم / يوم
2- امهات فاضية : مش شغالة يعنى او معهاش خلفة و لا حامل بتاكل برده 150 جم / يوم
3- امهات عشار : 200 جم / يوم مع مراعاة انه فى اخر 5 ايام من الحمل اكلها بيقل بسبب ان الاجنة بتضغط على المعدة فبتقلل من حجم الماكول
4- امهات مرضعة : و دى بنقسمها نوعين
أ : مرضعة بس و دى بتاخد حوالى 200 جم / يوم و ممكن نزود ل 250 جم / يوم على حسب عدد الخلفات
ب : مرضعة و عشر فى نفس الوقت و دى بتاخد ما لايقل عن 300 جم / يوم و على حسب حالتها يعنى لو حسيت انها جعانة و بتدور
على العلف او مخلصة على العلف اول باول زود لها 100 جم كمان . انا كان عندى ام فلمنش جاينت كانت حامل بتاكل فى اليوم نص كيلو علف تقريبا و بعد كده لاقيتها ولدت 12 فطبعا فهمت كل العلف ده راح فين هههههههههههههه بس دى كانت حالة شاذة

فى الحالتين ( أ ) و ( ب ) فى اخر عشر ايام من فترة الرضاعة الفطام الصغيرة بيطلع بره بيت الولادة و بيزاحموا الام فى العلف فتعمل حسابك ان فى الفترة دة تزود 50 جم علف لكل ارنب صغير مع الام و ده طبعا عشان تقدر تفطمهم فى الميعاد و ما تاثرش على وزن الام

5- الفطام : الفطام بيتسمن 30 يوم من بعد ما يتفطم من على امه و بياخد 100 جم فى اليوم يعنى 3 كيلو فى الشهر و ده طبعا لو نوع العلف كويس

6- السلالات : السلالات بتتربى 5 شهور من تاريخ الولادة للاناث و 6 شهور من تاريخ الولادة للذكور و العلف بيكون كالاتى :

الشهر الاول : رضاعة
الشهر الثانى : 100 جم / يوم
الشهر الثالث : 125 جم / يوم
الشهر الرابع : 150 جم / يوم
الشهر الخامس : 150 جم / يوم
الشهر السادس : 150 جم / يوم

و طبعا ما تزودش عن كده للسلالات حتى لو كانت جعانة و بتعضعض فى السلك لانك فى الاخر عايز سلالات رشيقة جسمها متناسق و خالى من الدهون عشان يولودوا

يا ريت يا جماعة بلاش فكرة العلف المفتوح دى اللى شفتها هنا على المنتدى كتير لانها بتهدر العلف من ناحية لان الارنب بينكش فيه و لو ما نكش فيه بعد يومين بتلاقيه باظ من الرطوبة اللى فى الجو

و يا رب الموضوع يعجبكم و يفيدكم

ربنا معاكم

منقول