الحلقة الاولي من ماساة ومعاناة عذاري مع زوجها

من طرف **عذاري** الخميس ديسمبر 04, 2014 2:51 pm

اول مرة اسولف واشكى لان بالواقع مااقدر اشكى لاي احد يشمتون فينى او يعرفون مشاكلي
الله ينتقم من زوجي لاني يتيمة الابوين مات ابوي بعد الملكة بشهر وبعد ماامي كملت العدة تزوجت انه عمرى كان 16 سنه ومااعرف شي بالحياة تربيت حياة حلوة سعيدة ابيت ابوي المهم لما خطبني رفضته اكثر من مره وفجاة وافقت عليه اشلون ماادرى وصارت الملكة ومات ابوي بعدها ابشهر وجهه نحس علينا كملت امي العدة لوفاة ابوي وتزوجنا كنت غبية وايد ساعدته وايد ابحفلة الزواج وابكل شي حتى امي كانت تساعده كان اكبر منى ابوايد اول ماعرف اني ورثت من ابوي ترك شغله وقعد بالبيت وانا اللي اصرف امس ساعدتنا وايد مااتذكر ان في يوم اخذ لي هديه الحنان ماشفته كل تفكيره الفلوس بس عطيني وسوى وسوى وانا الغبية اعطيه اقول زوجي لازم اساعده الحياة مساعدة بعت ذهبي كله وبقت الشبكة وبعتها بعد وكنت اعطيه الفلوس الله يعطيه نار جهنم انشاء الله وتحملت وايد انا جميلة وهو دائما يحاول اي شي اسويه يطلع الف عيب فيه يكسر خاطرى ابكل شي اقول له كلام حلو ومااتذكر اني رفعت صوتي عليه هو استغل طيبتي هو واهله للاسف كنت اييب الماي له لمكانه واطبخ احسن اكل واشترى له ملابس وكل شي اخذ من امي اغراض البيت ومصروفنا تخيلوا بعدها حملت باول ولد وكنت فرحانه اني بصير ام كل شي شريته امي كل شي شرت لي للبيبي وانا في نهاية الشهر الثامن قلوا لي ان بييب ولد وان كل شي زين رحت اقول له ولاهله وللكل ان بييب ولد وفرحانه نمت وبعدها لقيت نفسي بالانعاش تخيلوا ومات البيبي وانا بالعنايه المركزة بين الحياة والموت المهم بعدها طلعوني من الانعاش وعرفت شنو صار لي قالو صار لي تسمم حمل ارتفع فجاة ضغطى وماودوني اهله لمدة 3 ايام خلوني بالبيت لين راح النبض وودوني بعد ماامى هددتهم ان بتشتكى عليهم لو ماودوني المستشفي لما شافونى بموت خلاص طلبوا الاسعاف وخذوني للمستشفي بين الحياة والموت والتف الحبل السري على البيبي ومات في اخر لحظه وانا دخلوني الانعاش لمدة اسبوعين حالتي خطرة وبعدها الله انقذني الحمد لله ورجعت البيت وواصلت حياتي معاه من غبائي وطيبتي قالوا الدكاترة بان كان ممكن ينقذوني لو يابوني المستشفي وكانوا بحققون معاهم بس مارضينا حسبنا الله ونعم الوكيل فيه وفي اهله ماعرفوا الدكاترة سبب لحالتي
هذي اول حلقة من ماساتي وراح اكمل لكم الباقي ابقي الكل يستفيد من قصتي

من طرف **الثلج الاسود** السبت ديسمبر 06, 2014 8:11 am

اول شئ اخت عذاري لك كل الاحترام علي ثقتك فينا وطرح همك ومشكلتك معانا

ثانيا : استغرب في بعض الرجال اللي للاسف تجردوا من قيم الرجولة ادني قيم الرجولة وسمحوا لانفسهم يكونوا عاله علي زواجاتهم

ثالثا : وهي الطامة الكبري في نظري انه حتي بعد ما صاروا اشباه رجال وحريمهم يصرفون عليهم ما يردوا الاحسان بالاحسان لا اله الا الله

اخت عذاري انتي ذكرتي انك رفضتيه اكثر من مرة وربك كتب وتزوجتيه هذا ابتلاء ولك كل الحق في الصبر عليه او تركه

بالنسبة لموقف وفاة جنينك فهو خير لك وشر عليه وعلي عائلته خير لك من عدة نواحي اهمها انه مايربطك بها الشخص اولاد ممكن تضحي علشانهم في المستقبل وخير لك عند الله لانك مظلومة وجنينك يشفع لك يوم القيامة

اما بالنسبة لهم فهو شر لانهم تسببوا في ازهاق نفس باهمالهم

اختي اتركيه وشوفي شخص يخاف الله فيك ويعاملك كانسانه بمشاعر انتي صغيرة اختي ماشاء الله وحرام هذا الشخص يحرق قلبك وقلب اهلك عليك

لاتقولي انا بكون مطلقة نصيبك راح يجيك اختي

قال الله تعالي وما جزاء الاحسان الا الاحسان وينه من ها الكلام وين الوفاء وحسن العشرة

عاشروهم بمعروف او تسريح باحسان والي الان مو شايف شئ قلتيه يخليك تتمسكي بها الرجل الا اصلك الطيب

الله يوفقك يارب ويفرج عليك وعلي كل انسان

في انتظار باقي معاناتك لو يريحك انك تشاركينا فيها

موفقة يارب

من طرف **عذاري** الأربعاء ديسمبر 24, 2014 5:10 pm

مشكور اخوي الثلج على ردك وتعاطفك معاي بس انه للحين ماخلصت قصتي في اجزاء راح اكتبها ويمكن تبكون لما تسمعونها مأساة الم قهر معاناه انا صابرة علشان عيالي انا اللحين مو صغيرة عمري في الثلاثين وراح اكمل قصتي ومأساتي علي اجزاء الله ياخذه وينتقم منه بضيع شبابي بس مو مهم علشان عيالي ماابقي اضيعهم اشكر مرورك على صفحتي راح اكمل لكم مأساتي انتظروني ابقيها عبرة للغير حتي مايقصون عليهم ااه من الالم والقهر هدوني

الحلقة الاولي من ماساة ومعاناة عذاري مع زوجها 395600_1409814738

الحلقة الاولي من ماساة ومعاناة عذاري مع زوجها 395600_1409814738

من طرف **همسة** الخميس ديسمبر 25, 2014 12:21 am

الله بياخذ حقج ان الله يمهل ولا يهمل بياخذ حقج وبتتفرجين عليهم الله يبتليهم ابمصايب امين كل اللي ظلموج وتتفرجين عليهم امين ويبتلي كل ظالم مثلهم انشاء الله يتعذبون مثل ماتعذبتي كملي كل قصتج كلنا معاج ومع دلال والكل كلنا اسرة وحدة بالمنتدى الله يفرج همكم وياخذ حقكم